Првиот заменик-претседател на Владата и министер за европски прашања, Беким Сали, денеска пристигна во Киев каде ќе учествува на Самитот Украина – Југоисточна Европа, кој се одржува по повод Денот на државноста на Украина – информираат од МЕП.
По пристигнувањето во Украина, министерот Сали бил пречекан од заменик-министерот за надворешни работи на Украина, Олександр Мишченко, амбасадорот на Македонија во Украина, Димитар Блажевски, како и од претставници на Министерството за надворешни работи на Украина и други високи официјални претставници.
-Учеството на првиот заменик-претседател на Владата на овој Самит претставува потврда на континуираната поддршка на Македонија за Украина, нејзиниот суверенитет, независност и територијален интегритет, како и за нејзината европска перспектива – велат од Министерството.
За време на престојот во Киев, министерот Сали ќе учествува на пленарната сесија на Самитот Украина – Југоисточна Европа, каде што ќе ја реафирмира подготвеноста на Македонија да продолжи со поддршката за Украина и да го сподели своето искуство и експертиза стекнати во процесот на европската интеграција.
Самитот, нагласуваат од МЕП, ги обединува лидерите и високите претставници од Украина и земјите од Југоисточна Европа, со фокус на зајакнување на регионалната соработка, поддршката за Украина и унапредувањето на нејзината европска агенда.
