Во касарната „Илинден“ во Скопје денеска беше презентиран дел од опремата за Армијата набавена со поддршка од Европската Унија преку Европскиот мировен фонд.
-Ова е првиот пакет на опрема што пристигна, зборуваме за пакет од околу 40 милиони евра и плус дополнителни два милиони евра за балканските медицински цели, истакна министерот Владо Мисајловски.
Имено, министерот упати благодарност кон амбасадорот на Европската Унија во земјава Михалис Рокас како и на целиот негов тим, на претставниците што се тука и на претставниците што се од Брисел.
-Работиме секој еден ден за што повеќе опрема да добиеме, сакам да истакнам дека станува збор за целосен грант, директни средства од Европската Унија. Поради нашата заедничка европска безбедносна политика, поради нашиот однос заради она што помагаме во мисиите, зошто имаме постојана комуникација, сето ова е еден плод на соработката и се надевам дека ќе има уште многу вакви настани каде што ќе видите и доплнителна опрема, како и оваа опрема позади мене е една од најквалитетните, изјави министерот за одбрана Владо Мисајловски.
На настанот присуствуваа премиерот Христијан Мицкоски, министерот за одбрана Владо Мисајловски, амбасадорот на Европската Унија во земјава Михалис Рокас и началникот на Генералштабот на Армијата, генерал-мајор Сашко Лафчиски.
За време на настанот освен презентација на опрема, беше изведена показна вежба од страна на припадниците на Армијата.
