Градоначалникот Тони Коњановски и секретарот на Општина Битола Борче Димитровски продолжија со традиционалните месечни средби со новинарите на кои информираа за тековните проекти што ги реализира локалната самоуправа.
Фокус на денешната средба во кабинетот на битолскиот градоначалник беа инфраструктурните проекти, изградба на спортски игралишта и спортски сали, а наскоро ќе биде објавен јавен повик за набавка на електрични велосипеди.
-Во рамки на програмата за животна средина обезбедивме 4,8 милиони денари за набавка на електрични велосипеди. На овој начин ја потврдуваме тенденцијата Битола да стане вистински вело-град за што изградивме велосипедски патеки. Новите електрични велосипеди ќе се користат врз принципот на изнајмување, преку апликација со симболични цени на изградени велосипедски патеки. На неколку пунктови граѓаните ќе имаат можност да изнајмуваат велосипеди од сите страни на градот, помалку да користат возила, а повеќе велосипеди и, и тие да придонесуваат за заштитата на животната средина, истакна градоначалникот Коњановски.
Во изјава за медиумите, градоначалникот Тони Коњановски истакна дека Општина Битола во рамки на програмата и активностите кои ги реализира заедно со Владата на Република Македонија, се изведува поголем проект за реконструкција и обновување на сите спортски терени во училишните дворови во Битола.
-На десет локации се градат 26 спортски игралишта со комплетна опрема, тартан подлога и заштита, оградување и осветлување. Спортските терени кои биле градени во минатиот век, сега ќе бидат целосно со нова спортска опрема и тоа ќе овозможи враќање на спортот како активност, но и одвојување на децата од мобилните телефони, во замена на спортски дух и физичка активност. Овој проект во најголем дел е завршен, а дел од проектите се реализираат затоа што имаме обезбедени средства. Важно е да се истакне дека кај дел од училиштата ќе има и спортски сали кои ќе се наоѓаат во урбаниот и руралниот дел на општината, посочи Коњановски.
Општина Битола наскоро ќе ја пушти во употреба новата детска градинка што се наоѓа во непосредна близина на ОУ „Св. Климент Охридски“, која е комплетно опремена, обезбеден е персонал и се очекува согласност од надлежните органи за прием на деца.
