Јавното комунално претпријатие „Брегалница“ – Делчево соопшти дека во тек се технички интервенции за отстранување на дефектите на водоснабдителниот систем во село Град, поради што водата во моментов не се препорачува за пиење и подготовка на храна.
Од претпријатието информираат дека во изминатиот период биле преземени активности за оптимализација на водоводната мрежа, но поради осцилациите во приливот на вода, карактеристични за овој период од годината, дошло до притисочни девијации во системот, што предизвикало оштетувања на зафатите за каптирање на водата.
-Дополнително, осцилациите во притисокот предизвикаа проблеми и на делови од дотраената водоводна мрежа, при што настанала локална хаварија која довела до заматување на водата во системот за водоснабдување на селото, информираа од претпријатието.
Како што наведуваат од ЈКП „Брегалница“, пред неколку дена бил евидентиран дефект на главниот доводен систем, односно на каптажата, зафатот за вода и магистралниот цевковод кој ја транспортира водата до резервоарот од кој се снабдува село Град.
-Состојбата дополнително се влоши по последните обилни врнежи, кои придонесоа за зголемена матност на водата на самиот водозафат, што негативно се одразило врз квалитетот на водата во дистрибутивната мрежа. Постапуваме согласно законските процедури и дека континуирано се следи состојбата, додека надлежните служби вршат анализи на здравствено-техничките параметри, со посебен акцент на матноста на водата, посочија од претпријатието во соопштението до јавноста.
До целосно нормализирање на состојбата, од ЈКП „Брегалница“ апелираат граѓаните од село Град да не ја користат водата од водоводниот систем за пиење и подготовка на храна.
