Во Делчево започна уредувањето на просторот пред Споменикот на паднатите борци, со што локалната самоуправа ја започнува реализацијата на активности насочени кон обновување и зачувување на едно од најзначајните спомен-обележја во градот.
Од Општината информираат дека целта на интервенцијата е враќање на достоинствениот изглед на споменикот и неговата непосредна околина, со што ќе се создаде поуреден и попристапен јавен простор за граѓаните и посетителите.
Во рамки на активностите се врши расчистување и хортикултурно уредување на просторот, отстранување на оштетените и дотраени елементи, како и други зафати кои ќе придонесат за подобар изглед на овој значаен меморијален комплекс.
Од локалната самоуправа истакнуваат дека споменикот, кој подолг период не бил одржуван во состојба каква што заслужува, постепено добива нов и поуреден лик благодарение на ангажманот на општинските служби и вработените кои работат на терен.
-Грижата за историското и културното наследство претставува обврска кон минатото, но и инвестиција во иднината. Со уредувањето на овој простор сакаме да покажеме почит кон паднатите борци, но и да создадеме достоинствен амбиент кој ќе биде место за одбележување на значајните историски датуми и настани – наведуваат од Општина Делчево.
Додаваат дека ќе продолжат со активности за подобрување на јавните површини и уредување на значајните локации низ градот, со цел Делчево да биде почисто, поуредено и попривлечно место за живеење и за посетителите.
