Во тек е изградбата на новата пешачка патека меѓу селата Таринци и Карбинци во општина Карбинци. Патеката е долга 1,5 километрии и ќе овозможи побезбедно движење на пешаците меѓу двете населени места. Градоначалникот на општина Карбинци, Виктор Паунов вели дека освен за секојдневно пешачење, таа ќе служи и како простор за рекреација.
-Овој проект е еден од поважните за оваа година, затоа што поврзувањето помеѓу овие две населени места ќе значи продолжение со една ваква зона за рекреација, зона за пешаци. Најпрво од безбедносен карактер, затоа што жителите и сите оние кои ќе сакаат да се рекреираат, но и да се движат помегу овие две население места, ќе можат да го направат по оваа патека, на еден безбеден начин-рече Паунов.
Со претходно изградената пешачка патека од Долни Балван до Таринци и новата што се гради меѓу Таринци и Карбинци, жителите ќе добијат вкупно околу 3,5 километри безбеден простор за пешачење и рекреација.
Проектот се реализира со финансиска поддршка на Министерството за локална самоуправа од 4,5 милиони денари, а 6,5 милиони денари се обезбедени од буџетот на Општината. Изградбата на пешачката патека од Таринци до Карбинци се очекува да заврши во текот на летото.
