Здравје со врски,пари, подароци, па дури и сексуални услуги – ова, според најновото истражување на Здружението ЕСЕ, е цената што дел од пациентите ја плаќаат за да стигнат до лекар, операција или подобар третман. Според, извештајот најчест облик на корупција е директно земање пари од пациенти или нивни роднини. Следуваат подароци, препраќање во приватни ординации, препораки за одредени лекови. Истражувањето открива и уште потемна страна на системот. Секој петти здравствен работник слушнал дека колега барал или очекувал сексуална услуга од пациент во замена за здравствена услуга, а дел од медицинскиот персонал бил изложен и на сексуални притисоци од свои колеги или претпоставени. Дури 84 проценти од анкетираните здравствени работници сметаат дека корупцијата е делумно или многу распространета во системот, а загрижува фактот што само седум проценти од оние што знаеле за корупција се осмелиле да ја пријават.
Особено загрижува состојбата во гинекологијата и акушерството. Истражувањето покажува дека во повеќе од половина од случаите поткупот се користи за царски рез без медицинска потреба или за избор на конкретен гинеколог и тим при породување.
Според мислењето на здравствените работници, за борба против корупцијата неопходни се системски мерки, заштита на пријавувачите, построги казни, засилени контроли, подобри плати и услови за работа. Така медицинските работници би се охрабриле да пријават корупција. Сега се плашат од последициите бидејќи имаат недоверба во институциите.
Истражувањето опфаќа 410 здравствени работници и анкетирани се повеќе од 20 директори во здравствени установи.
