Членовите на Комисијата за финансирање и буџет на денешната шеесет и седма седница едногласно одлучија да се одржи јавна расправа по Предлог законот за игрите на среќа и за забавните игри, а терминот на одржување дополнително ќе биде соопштен.
Собраниската комисија денеска ја разгледа единствената точка на дневниот ред која беше предложена, одлуката за одржување јавна расправа за предлог-законот. Членовите на комисијата немаа предлози за изменување и дополнување на дневниот ред, го усвоија со 10 гласа „за“, без против и воздржани.
– До Комисијата за финансирање и буџет односно, до мене како претседател се стигнати три барања за одржување на јавна расправа по предлогот на законот за игри на среќа за забавните игри, една од пратеничката група на СДСМ, едно е од Асоцијацијата на приредувачите на игрите на среќа, АПИС и третото барање е од страна на групацијата на игри на среќа коишто се во рамки на Стопанската комора на Македонија-рече претседателката на комисијата, Сања Лукаревска.
Точката беше усвоена со десет гласа „за“, без „против“ и „воздржани“.
– Констатирам дека Комисијата за финансирање и буџет донесе одлука за одржување на јавна расправа по предлогот на Закон за игрите на среќа и за забавните игри. За денот и времето на одржување на јавната расправа дополнително ќе бидете известени – кажа Лукаревска.
