Поддршка на луѓето со попреченост, бездомниците, лицата од третата доба, старите и изнемоштени лица, пакување и дистирубуција на хуманитарна помош, активности од областа на првата помош и крводарителството. Волонтерите од Црвениот крст заедно со поддршка од пратениците денеска излегоа на терен со полни раце работа на одбележувањето на 5 Декември – Светскиот ден на волонтерството.
„Волонтеризмот е вредност и капитал на секое општество, па и на нашето, и денеска благодарение на нив придонесовме на неколку граѓани во еден момент да им го подорбиме тековното дневно живеење. Беа вклучени околу 20-тина пратеници, толку и побараме затоа што капацитетите на просториите каде што се волонтираше тоа го побараа. Интересот беше на потребното ниво и сметам дека денеска заедно упативме силна порака до сите тие луѓе кои се уште не го направиле својот чекор во смисла на волонтирањето, да го направат“ вели Саит Саити, генерален секретар на Црвен крст Македонија
Законот за волонтерство е застарен и е потребно негово усогласување со актуелните општествени потреби, истакна претседателот на Собранието Африм Гаши. Тој потенцираше дека ваквите акции ја доближуваат институцијата до граѓаните.
„Заедно со пратеници од сите плитички партии, сите кои сакаа да учествуваат бевме поделени во неколку групи, и ние како пратеници бевме вклучени активно во волонтирањето и бевме дел од таа армија на волонтери во државата која е над 5.000“ вели Африм Гаши, претседател на Собрание
Во Малиот свечен салон во Парламентот беа доделени благодарници на сите волонтери вклучени во помошта и поддршката на настраданото население во Кочани. Црвениот крст годинава го одбележува 80-годишниот јубилеј, како организација со свои канцеларии и пунктови делува преку 33 општински организации низ државата.
Давид Крстевски
