Нов ден – нови случувања на Блискиот Исток. И денеска одекнуваат експлозии во Доха, Кувајт, Дубаи и Абу Даби…Тензиите ја зголемуваат загриженоста кај граѓаните, но македонските државјани кои живеат и работат во регионот велат – засега нема простор за паника. Ангела Николовска, која живее во центарот на Доха, вели дека граѓаните внимателно ги следат инструкциите од надлежните институции.
Слична е сликата и во Дубаи, во Обединети Арапски Емирати, каде живее бројна македонска заедница. И таму, според нашите информации, безбедносните служби се во зголемена готовност, но секојдневието функционира без прекини..
Во меѓувреме, 400 македонски државјани од загрозените жаришта, покажале интерес за евакуација,од нив 30 за напуштање на земјата во првата прилика – информираат од македонското МНР. Во моментов нема услови за евакуација на државјаните кои се наоѓаат во Обединети Арапски Емирати и Катар.
“Со сите пријавени лица се одржува редовна и континуирана комуникација, при што се преземаат подготвителни активности за евентуална асистенција и нивна безбедна евакуација, во зависност од развојот на состојбата.
Паралелно, дипломатско-конзуларните претставништва ги преземаат сите неопходни мерки за подготовка и безбедна реализација на евакуацијата на граѓаните кои изразиле подготвеност за тоа” – велат од МНР.
Веќе трет ден по ред е затворен најпрометниот меѓународен аеродром во Дубаи, поради ескалацијата на конфликтот на Блискиот Исток. Според најновите податоци, откажани се 1.239 летови, а илјадници патници се заглавени или ги менуваат своите патувања.
Три од најголемите авиокомпании во регионот – Emirates со седиште во Дубаи, Etihad Airways од Абу Даби и Qatar Airways од Доха – заедно откажаа стотици летови..
И Визер суспендираше повеќе летови од и кон Блискиот Исток.Од компанијата соопштија дека сите летови до и од Израел, Дубаи, Абу Даби и Саудиска Арабија се суспендирани заклучно со 7 март.
Експертите предупредуваат дека оваа состојба може да предизвика сериозни глобални последици – од доцнење на карго-пратки и прекин на синџирите на снабдување, до нов раст на цените на авионските билети.
Ања Лукарова
