Помалку чекање, повеќе места за најмалите. Градежниот бум низ државава не опфаќа само патишта, мостови, железница. Со изградбата на нови градинки, надлежните очекуваат намалување на листите за чекање и можност повеќе деца да добијат можност за згрижување, особено во Скопје и скопските општини. Целта на Владата е не само да се градат нови, туку да се модернизираат и постојните градинки.
Остануваат во 2026 и 2027 да отвориме вкупно 37 вакви објекти, каде што ќе задоволиме капацитет на повеќе од 3800 дечиња, а тоа значи дека листите на чекање кои што денеска ги имаме, околу 4000 такви дечиња, ќе биде буквално сведен на нула. 15 од овие 37 ќе бидат отворени до крајот на 2026 година. -изјави Ѓоко Велковски, министер за социјална политика, демографија и млади.
Една од општините каде во тек се активности за модернизација на капацитетите е и скопската општина Илинден. Таму денеска беше пуштен во употреба целосно нов објект во кој ќе се приготвува храна не само за локалната градинка, туку и за основните училишта.
Oвој нов објект, централна кујна, е во квадратура од 300 квадрати и ќе има капацитет за 800 оброци на ден, односно ќе ги задоволува потребите на сите дечиња што ги има во градинките, но воедно ќе ги задоволува и потребите на дечињата кои што се наоѓаат во целодневен престој во основните училишта. -кажа Александар Георгиевски, градоначалник на Општина Илинден.
Парлалено, во Илинден се реализираат и повеќе други инфраструктурни проекти. Надлежните направија увид и во целосната реконструкција на една од главните улици во општината- која не опфаќа само нов асфалт туку и замена на подземната инфраструктура- водоводната и канализациската мрежа.
