Дел од граѓаните денеска го одбележуваат 14 февруари во духот на љубовта, додека други му оддаваат почит на празникот св. Трифун денот на виното. Помладите најчесто го слават празникот посветен на св. Валентин, разменувајќи подароци, цвеќе, мечиња со нивните најсакани. Црвената боја, ружите и чоколадите доминираат по излозите, а срцињата како симбол на љубовта се забележуваат секаде низ градот.
Повозрасните пак, се верни на христијанскиот празник св. Трифун, заштитникот на лозарите. Најчесто го слават со чаша вино, прошетки и време поминато со своите најблиски.
„Ние славиме св. Трифун, ден на лозарите. Ќе го славиме со прошетка некаде. Трифун е наш празник, христијански…“
„Валентин. Ќе го славам во ресторан, и ќе купам некое поклонче, букет, можеби некое чоколадо…“- велат граѓаните.
Во продавниците и цвеќарите има зголемена раздвиженост. Продавачите велат дека најголем дел од купувачите се младите кои бараат поклони за своите партнери, а тие најмногу купуваат мечиња и рози.
„Работата иде најдобро за св. Валентин, многу купуваат од кај нас. Најмногу купуваат ружички, буќетчиња, мечиња. Млдите купуваат повеќе.“- велат продавачите.
Свети Трифун се смета за заштитник на лозарите, а според верувањата ги штити лозјата и градините од штети и несреќи. Свети Валентин, пак, кој се празнува во католичката и протестантските цркви, се смета за заштитник на љубовта. Последниве години, под влијание на западните земји, неговиот празник се повеќе се одбележува и кај нас, особено меѓу помладите.
