Како да не е доволно што на 40 степени треба да се возите со автобус, па уште и треба да го чекате со часови, ако воопшто стигне. А кога ќе се качите во него, треба да ви е страв дека тоа може да ви биде последно возење. Повеќето остануваат со дефект, а не ретко пламнуваат во оган или се превртуваат. Последниот инцидент во низата беше вчера кај фабриката Цементарница во Кисела Вода, кога втобусот со број 13 кој патувал од Железара се запалил во делот на моторот.
Благодарение на брзата реакција на возачката – единствена жена во ЈСП што вози, која веднаш го почувствувала чадот и алармирала, па патниците навреме излегле и затоа нема повредени. Огнот не можел да го изгаснат затоа што еден од противпожарните апарати во автобусот, не работел, а вториот бил без црево. За среќа наишол друг автобус, па биле искористени апаратите од кај него.
Поради вдишениот чад, возачката итно била пренесена во болница, но по неколку часа откако ѝ била утврдена стабилна состојба, пуштена е дома. Граѓаните реагираат. Бараат одговори, решенија и обнова на градскиот возен парк. Велат на овие пеколни температури е неподносливо да се патува со автобус во Скопје.
Сето ова се случува додека градоначалничката Арсовска бистри политика и се пресметува со колегата од Чаир, Висар Ганиу. Објавува фејсбук статуси за дивоградбите во Чаир, наместо да се занимава со решавање на вистинските проблеми кои ги тиштат скопјани. Реакција стигна и од синдикатите кои велат дека возачите трпат притисоци од своите претпоставени. Велат дека се приморани да возат расипани автобуси иако навреме ги пријавуваат дефектите.
„Ние ги знаеме точно проблемите што ги имаат возачите. Точно знаеме што проблеми имаат самите возила, ама директорот само вика, толку знам“, изјави Меџит Идризи – Генерален Секретар на СПАЈС.
„Возачите му алармираат на шефот дека возилото не е добро, они му прават шефовите во ЈСП, тие што се главните јунаци, херои во ЈСП, му прават да речеме таков проблем и притисок на секој возач кај што му налагаат задолжително да седне на возило. Па дури имало возила без антифриз“, изјави Гоце Делчев – Генерален Секретар на КСОМ
Синдикатите алармираат дека само 40% од возниот парк на ЈСП е технички исправен. Во последните 12 месеци – најмалку пет автобуси на ЈСП се запалија – а поради дефект еден заврши директно во жардињера.
