Пекол во главниот град. Скопје ги живее најтоплите денови во последните години. Воздухот е врел, асфалтот гори, а температурите се искачија над 40-тиот степен. Улиците се празни, сенките стануваат спас за граѓаните кои викендов се во главниот град.
Неиздржливото време предизвикува здравствени проблеми кај граѓаните. Колапси по улици, слабост, отежнато дишење. Итната медицинска помош веќе бележи интервенции – и покрај апелите, граѓаните не секогаш ги следат препораките. Од Итната медицинска помош велат – утрото започна бурно.
„До 11 и 15 веќе имавме три колапси, една во домашни услови, другите на јавни места. Граѓаните се жалат на варијации во крвниот притисок, вртоглавици, отежнато дишење. Се знае – од 11 до 17 часот да не се излегува ако не е неопходно. Да се носи полесна облека, капи, вода, и секако, редовната терапија да се зема со претходно мерење на притисок“, изјави Рихад Реџепи дежурен од Итната помош.
Некои ги слушаат препораките. Други – не. Повеќето – бараат полусенки, како привремено спасение од неподносливото жешко.
Според метеоролозите, ова би требало да биде последниот ден од најсилниот топлотен бран годинава. Од утре – благо освежување и мал пад на температурите. Но, додека жештината не попушти, повикот останува ист – внимавајте на здравјето и хидрирајте се.
