По потпишувањето на Договорот за стратешка соработка меѓу двете влади, имав задоволство да учествувам на сесијата за економски дијалог и вмрежување меѓу институционалните претставници и бизнис-заедницата, каде што беа разгледани конкретни можности за нови инвестиции, проширување на економската соработка и зајакнување на врските меѓу јавниот и приватниот сектор – изјави директорот на МЕПСО, Бурим Љатифи, во врска со денеска потпишаниот Договор меѓу Македонија и Хрватска.
МЕПСО соопшти дека во рамки на билатералната средба меѓу Владата на Македонија и Владата на Република Хрватска, предводени од премиерите Христијан Мицкоски и Андреј Пленковиќ било потврдено стратешкото партнерство меѓу двете земји, како и посветеноста за продлабочување на соработката во клучни области од значење за економскиот, инфраструктурниот и енергетскиот развој.
-По потпишувањето на Договорот за стратешка соработка меѓу двете влади, имав задоволство да учествувам на сесијата за економски дијалог и вмрежување меѓу институционалните претставници и бизнис-заедницата, каде што беа разгледани конкретни можности за нови инвестиции, проширување на економската соработка и зајакнување на врските меѓу јавниот и приватниот сектор. Во својство на директор на МЕПСО, ја истакнав стратешката важност на развојот на енергетската инфраструктура и дигиталната трансформација на системот за пренос на електрична енергија, како предуслов за зголемување на енергетската сигурност и стабилност, како и за подлабока интеграција во европските енергетски пазари, изјавил Љатифи.
Во тој контекст Љатифи нагласил дека нашиот моментален фокус е насочен кон проектите за регионално поврзување, особено интерконекцијата со Република Албанија преку изградба на трансформаторска станица и далекувод, два стратешки проекти што ги реализираат хрватски компании со меѓународен углед, како „Далековод Загреб“ и „Кончар Груп“.
-Исто така, истакнав дека, врз основа на моето професионално искуство, добро ја познавам важноста на странските инвестиции и нивната клучна улога во развојот на јавните институции и приватните компании, преку придонес кон модернизација, зголемување на капацитетите и подобрување на економските перформанси – изјавил Љатифи.
Оваа продлабочена соработка меѓу двете земји, наведуваат од МЕПСО, претставува важен чекор кон зајакнување на стратешкото партнерство, развој на регионалната енергетска инфраструктура и создавање поповолна клима за одржливи инвестиции и долгорочен развој.
