Струшките вечери на поезијата се признат фестивал со македонски идентитет и тоа треба еднаш засекогаш да ви биде јасно. Стандардна практика е да се преведува на светските јазици, затоа што таму не ни доаѓаат само од одредени места, туку од сите страни на светот, одговори министерот за култура и туризам Зоран Љутков на пратеничко прашање од пратеничката Арбана Пашоли, која праша зошто албанскиот јазик отсуствува од промотивните материјали на фестивалот Струшки вечери на поезијата.
Според министерот Љутков, целта на манифестацијата е да го заштити македонскиот јазик и да го промовира во целиот свет.
-Ако бевте синоќа на отворањето, ќе забележевте дека говорот на претседателката на државата и говорот на министерот за култура и одредени поезии беа преведени и на албански јазик. Но, тоа не можевте да го видите затоа што вашата суштина, вашата тенденција е се што е добро во државата, не да го гледате како суштина, како историја, како култура или традиција, туку суштината е да го гледате на национална основа, на етничка основа, а себеси да се гледате како проценти. Дали знаете која е историјата на Струшките вечери на поезијата? Дали знаете зошто е создадена таа манифестација? Оваа манифестација е да го заштити македонскиот јазик и да го промовира во целиот свет. Тоа кога ќе го разберете, тогаш ќе престанете да зборувате за проценти, за тоа дали имало превод или немало превод, посочи министерот Љутков до пратеничката Пашоли.
Тоа е, додаде тој, светска манифестација за поддршка на македонскиот јазик и превод треба да има на англиски јазик, за да не разбере целиот свет, и оти тоа е признат фестивал со македонски идентитет. Стандардна практика е да се преведува на светските јазици, бидејќи, вели, доаѓаат гости од целиот свет.
-Синоќа еден поет од Македонија својата поезија ја кажа на албански јазик и доби аплауз. Престанете да се гледате како проценти, тоа не е добро. Излезете, поддржете ја културата, зборувајте за убавините во Македонија, за убавата култура, а не да се гледате како процентче, одговори министерот за култура Љутков на пратеничката Пашоли.
