Шведско-македонската стопанска комора официјално ја отвори својата нова канцеларија во населбата Црниче, во Општина Кисела Вода, со цел да ја зајакне економската соработка меѓу Македонија и Шведска.
На свеченото отворање, што се одржа синоќа, присуствуваа градоначалничката на Општина Кисела Вода, Бети Стаменкоска Трајкоска, извршниот директор на комората, Самуил Наумовски Викиус, како и претставници на бројни домашни компании.
Зад комората стојат 35 етаблирани шведски компании, кои имаат за цел да создадат силен економски мост меѓу двете земји, да поттикнат нови деловни партнерства и да отворат можности за пласман на македонските компании на нови пазари. Големиот интерес од домашниот бизнис-сектор на отворањето, според организаторите, е показател за потенцијалот за интензивирање на економската соработка.
-Фактот што Шведско-македонската стопанска комора ја отвора својата канцеларија токму кај нас, потврдува дека како општина создаваме поволна бизнис клима препознаена од меѓународната заедница. Нашата намера е да бидеме силна поддршка на овој економски мост. Преку континуирана модернизација на услугите и поддршка на малите и средни претпријатија, обезбедуваме основа за привлекување нови инвестиции, кои ќе донесат нови работни места и одржлив економски раст- истакна градоначалничката Стаменкоска Трајкоска.
