Одличната билатерална соработка во областа на правосудството, владеењето на правото и реформските процеси, биле потврдени на денешната средба на министерот за правда, Јетон Шасивари со амбасадорката на Сојузна Република Германија во Македонија, Петра Дрекслер.
На средбата, како што посочуваат од кабинетот на Шасивари, било оценето дека Германија е еден од најзначајните партнери на Министерството за правда, во областа на меѓународната правна помош и реформите во правосудството.
Од Министерството за правда посочуваат дека во процесот на подготовка на новиот Кривичен законик, во соработка со ИРЗ – Германската фондација за меѓународна правна соработка, биле изготвени стручни мислења од врвни универзитетски професори, кои опфаќаат повеќе клучни области на современото кривично право.
На средбата бил поздравен и придонесот на Германското друштво за меѓународна соработка (GIZ) во подготовката на Законот за Канцеларијата за поврат на имот и Законот за управување со конфискуван имот, имотна корист и одземени предмети во кривична и прекршочна постапка.
Шасивари и Дрекслер ја потврдиле заедничката заложба за натамошно унапредување на соработката, размена на експертиза и поддршка на реформските процеси, со цел зајакнување на владеењето на правото и приближување на нашиот правосуден систем кон европските стандарди.
