Општинската организација на Црвениот крст – Кочани, во соработка со Одделението за внатрешни работи Кочани, денеска спроведе превентивни активности за заштита на населението од последиците од високите температури.
На кружниот тек кај Полициската станица и на Градскиот пазар во Кочани, волонтери на Црвениот крст делеа едукативни флаери со препораки и совети за граѓаните како да се заштитат за време на топлотниот бран.
Од Црвениот крст потсетуваат дека во најтоплиот дел од денот, од 10 до 17 часот, треба да се избегнуваат напорни физички активности и подолго изложување на сонце. Се препорачува редовно внесување течности, избегнување мрсна и калорична храна, како и носење лесна и светла облека, заштитни очила и капа.
Граѓаните беа информирани и дека при појава на симптоми како зашеметеност, слабост, вознемиреност, интензивна жед или главоболка, треба веднаш да побараат помош, да се засолнат на поладно место и да пијат вода .
