Општина Валандово ја заврши реконструкцијата на објектот на подрачното основно училиште „Даме Груев“ во Брајковци. Општинските власти информираа дека во рамки на проектот објектот е целосно обновен, извршено е подобрување на енергетската ефикасност, зголемена е функционалноста на просторот и обезбедени се подобри услови за учениците и наставниот кадар.
Училиштето дополнително ќе биде опремено со нов училиштен мебел, како и со клупи и столчиња, со што учениците новата учебна година ќе ја почнат во современо опремен училиштен простор, најави градоначалникот на Валандово, Ѓоко Камчев, на седница на Советот на Општината.
Според надлежните, инвестицијата вредна над 10 милиони денари е реализирана со средства обезбедени од Владата преку унгарскиот кредит, а е дел од поширокиот четиригодишен план за развој, со цел создавање современи и функционални услови за образование во сите училишта на територијата на општината.
