Дополнително возило и луѓе на терен попладнево се пристигнати на локацијата во близина на македонско – грчката граница, каде околу 10 часот е пријавен пожар, информираат од Центарот за управување со кризи во Гевгелија.
Според информациите од подружницата на ЦУК, заедно со двете противпожарни возила на доброволното противпожарно друштво „Дојран“ со пет пожарникари и едно специјално возило на ТППЕ Гевгелија со четворица пожарникари, на терен се и едно возило од ТППЕ Валандово со двајца пожарникари, како и осум вработени во „Македонски шуми“.
Ветерот со променлив правец и со различен интензитет попладнево го смени правецот на пожарот кој се појави на месноста Владаја кон населениот дел, поради што следеа реакции од жители кои веќе го гледаат поблиску огнениот чад.
Од Центарот за управување со кризи велат дека поради непристапниот терен на локацијата која минува низ Солунскиот фронт од Првата светска војна, потребно е внимателно движење и се чека огнот да дојде до дел од каде ќе може да се интервенира.
Местото е обезбедувано и од полициско возило. Според ЦУК – Гевгелија, гори деградирана шума и прнар, а поради присуството на ветер огнот се шири во повеќе правци.
Грчките медиуми од соседен Кукуш, со фотографии од нивни екипи на терен, исто така известија за пожарот.
