Црн и густ чад претопладнето се прошири низ Скопје чии жители повторно дишеа загваден воздух. Причината се два пожара кои избувнаа во околината на Визбегово и кои се проширија кон Шуто Оризари. Објекти за среќа не се зафатени, но проблем е што гори отпад, сува трева и вегетација. Од Центарот за Управување со Кризи од утрината се на терен, а во гаснењето помагаат и Бригадата за противпожарна заштита на Град Скопје.
„Пожарот во Шуто Оризари кај Џиди Комерц сеуште чади, запалено е ѓубриште и пластика и се шири непријатана миризба. Екипите на БППЗ на Град Скопје интервенираат во негово гаснење“, велат од Центарот за управување со Кризи.
Низ државата во моментов се регистрирани седум пожари од кои пет се активни. Најсериозно е во Старо Нагоричане, каде гори сува трева. Во околината на Дојран гори шума, а голем густ црн чад бил забележан и покрај автопатот од Велес кон Штип, кај Чолошево, во близина на Јавното комунално претпријатие „Дервен“. Од претпријатието велат дека не гори депонијата туку сува трева, грмушки и ниско стеблеста шума во нејзината околина:
„Станува збор за пожар на ниска вегетација и сува трева во близина на депонијата. Состојбата се следи и се преземаат активности во координација со надлежните служби за спречување на ширење на огнот“, соопштија од Јавното комунално претпријатие „Дервен“
Од Центарот за управување со кризи велат дека досега низ Македонија изгаснати се два пожара, во Долнени кај селото Житоште, во близина на училиштето, каде исто така горела ниска вегетација и сува трева и во село Кукуречани битолско, каде горело ѓубре.