ХЦ Чебрен е од огромно енергетско значење за Македонија , но лошо е што државата ја испушти шансата да ја изградиме ние. Според експертите лошата вест е што стратешкиот проект тежок една милијарда евра го добива компанија од надвор, во случајот од Грција, што долгорочно не дава надеж дека Македонија навистина ќе стане и енергетски независна. Во пракса тоа ќе значи дека електричната енергија која ќе биде произведена во Македонија со домашни ресурси ние повторно ќе треба да ја купуваме на берза:
Ако ја земеше Македонија ќе беа 100 милиони евра на годишно ниво , што не се големи пари за кај нас , сега струјата ќе ја произведуваме дома и ќе ја купуваме на берза . Веројатно до сега ниту едно стопанство не се сметаше компетентно да изгради една таква централа, а зошто до сега не се прифатени другите понуди, веројатно зошто биле многу штетни, вели Константин Димитров од МАЦЕФ
Владината одлука за издавање на концесија за користење на води за производство на електрична енергија на грчката Public Power Corporation отвора и низа дилеми. Колку од водата од вештачкото езеро ќе може да се користи за наводнување , колкава ќе биде поволноста за Македонија да купува поевтино струја , колку македонски фирми и дали воопшто македонското стопанство ќе учествува во градбата ? Ова се прашања кои на јавноста не и се познати , бидејќи не се знае што точно се потпишало. Од она што досега е познато во јавноста, грчката компанија ќе треба да отвори посебна фирма во Македонија во која учество би требало да има и државната ЕСМ, најверојатно од околу 30%. Експертите предупредуваат дека милијардата за Чебрен може да доведе до ново задолжување, без соодветен фидбек.
По 13 пропаднати тендери , по повеќе од 30 години Владата донесе одлука за доделување на концесија за изградба на ХЦ Чебрен . Предвидено е хидроцентралата да има функција на производство на електрична енергија како и режим на пумпање и враќање на водата назад со што на Црна река ќе се создаде најголемото вештачко езеро во Македонија . Откако ќе заврши проектирањето и собирањето на документацијата, предвидено е да се почне со градбата , рокот е 7 години а вредноста на договорот 1 милијарда евра .
Кристина Алексиеска
