Во „Европска куќа“ во Велес денеска ќе се одржи тренинг-работилница и презентација на проектот „Дигитален зелен пристап: Младите мапираат за инклузивна демократија“, иницијатива насочена кон подобрување на пристапноста на јавните институции за лицата со попреченост и другите ранливи категории граѓани.
Проектот „Digital Green Access“ е иницијатива за дигитална демократија предводена од млади луѓе, која има цел да одговори на долгогодишниот проблем со физичките бариери во институциите. Активностите се насочени кон подобрување на пристапноста за лица со физичка попреченост, родители со детски колички, лица кои користат помагала за движење, како и за лица со оштетен слух и вид.
На настанот ќе бидат претставени целите на проектот и активностите што предвидуваат дигитално мапирање на пристапноста на институциите.
Предвидено е младите лидери од XYZ Green Gen и Impact Hub, ученици од четирите средни училишта во Велес, да ја претстават дигиталната апликација што ќе биде развиена како алатка за мапирање на пристапноста на институциите.
