Во организација на издавачката куќа PMG Tanz Digital, електронското дуо Поетроника, составено од Андреја Салпе и Оливер Митковски, ќе го промовира третиот студиски албум „INTERIOR“.
Промоцијата е закажана за утре во 20:00 часот, во „Зеленика“, а покрај концертниот настап, уметникот Иван Ивановски во соработка со Партизанска штампа ќе изведе рачно сито-печатење, по што вечерта ќе продолжи со клупската програма Paranoid Vodno, со настапи на Боле, Лука, Мартина Пенева и Андреја Салпе.
-„INTERIOR“ е албум што се дистанцира од прекумерната продукциска обработка. Наместо внимателно конструирани студиски композиции, третото издание на Поетроника е изградено од неизменети фрагменти од студиски сесии снимени во текот на 2025 година. Резултатот е искрен и непосреден звучен запис на креативниот процес, кој ја доловува енергијата и одлуките што се носат во самиот момент на создавањето, велат Салпе и Митковски.
Во своето ново издание, Поетроника го проширува и препознатливиот однос кон текстот. Покрај поезијата, која останува важен дел од нивниот авторски израз, во албумот се вплетени интервјуа со уметници, публицистички текстови, како и фрагменти од приватна комуникација. Различните текстуални слоеви се третирани како рамноправен музички материјал, претворајќи се во органски дел од звучната целина.
„INTERIOR“ е напишан, продуциран, миксан и мастериран од Андреја Салпе и Оливер Митковски, додека визуелниот идентитет на албумот го потпишува Иван Ивановски.
-„INTERIOR“ уште еднаш го потврдува препознатливиот авторски пристап на Поетроника – способноста најразлични идеи, текстови и звуци да ги претвори во современо, софистицирано и автентично музичко дело. Албумот е за оние кои што имаат време, ако воопшто такви постојат сѐ уште на планетава, истакнуваат Салпе и Митковски.
Рачното сито-печатење што утревечер во рамки на настанот ќе го реализираат Ивановски и Партизанска штампа, е инспирирано од визуелниот идентитет на албумот. Посетителите ќе можат да донесат сопствени маици, платнени торби или други текстилни предмети што ќе бидат рачно отпечатени на лице место.
Албумот е веќе достапен за претнарачка преку Bandcamp страницата на PMG Tanz Digital.
