Над 100 домаќинства во Кадино ќе добијат можност за приклучување на канализациската мрежа преку новиот препумпен уред за фекална канализација чија изградба веќе започна, соопштуваат од Општина Илинден.
Проектот е дел од пошироката реализација на фекалната канализациона мрежа во Кадино.
– Препумпниот уред ќе биде поврзан со веќе реализираниот крак К4, долг околу 2.500 метри, на кој се изградени 50 шахти и со кој се овозможува приклучување на приближно 100 домаќинства – стои во соопштението.
Според планираното, преку новиот препумпен уред ќе биде опфатена канализационата мрежа од улиците „1“, „2“ и „3“. Отпадните води ќе се транспортираат преку веќе поставениот потисен цевковод до постојната пречистителна станица во Кадино, каде што ќе се врши нивно прочистување и третман.
Од локалната самоуправа информираат дека увид во тековните градежни активности извршил градоначалникот на Општина Илинден, Александар Георгиевски, кој истакнал дека инвестициите во канализационата инфраструктура се од особена важност за подобрување на квалитетот на живот на граѓаните, но и за заштита на животната средина преку современо и ефикасно управување со отпадните води.
