Ако пред неколку години беше успех два милиони патници да стигнат на аеродромите во Скопје и Охрид, минатата година бројот надмина три милиони на двата аеродрома. Очекувам оваа година бројот да биде над 3,5 милиони патници, изјави вицепремиерот и министер за транспорт Александар Николоски на седницата за пратенички прашања.
Во одговор на прашање од пратеничката Лидија Петковска од ВМРО-ДПМНЕ, Николоски рече дека аеродормот во Скопје има најголем поединечен раст во Европа и е лидер во средна категорија на аеродроми, а се подобрува и позицијата на охридскиот аеродром во категоријата мали туристички аеродроми.
Николоски нагласи дека фокусот на Владата е на развој на инфраструктура што, рече, е директно поврзано со развојот на туризмот. Се зголемува и авиосообраќајот и бројот на авиолинии, има нова методологија за зголемување на број на патници.
Посочи на зголемениот број редовни авиолинии, како и чартери од двата аеродрома и дека тоа се одразува на 20 отсто раст на туризмот. Но, сериозен предизвик, рече Николоски, се сместувачките капацитети и дека се потребни многу повеќе легла.
Николоски се осврна и на инфраструктурното поврзување на двата ародрома, при што кажа дека на скопскиот аеродром покрај со западната сега има и источно поврзување и аеродромот е од двете страни поврзан со автопат или експресен пат.
-Работиме на урбанистичко и идејно решение за железничко поврзување на аеродрмот, што ќе завршува пред терминалната зграда и ќе има олеснета комуникација со центарот на Скопје, додаде Николоски.
Како што рече, за охриддскиот аеродром некогаш во весник пишуваше дека таму слетуваат само птици, а сега има 13 редовни дестинации и 8 чартери, бројот на патници расте. Се работи на целосна реконструкција на аеродромот и очекува во следните два-три месеци да заврши и да ги добие сите дозволи односно да бидат запазени безбедносните процедури за да се користи новата терминална зграда.
