Недостатокот на квалификувана работна сила, високите цени на енергенсите, големата инфлација се најголемите проблеми со кои во 2022-та се соочија прилепските фирми, а кои според нивните очекувања, ќе се прелеат и во 2023-та.
„Сепак, треба да си го цениме она што го поседуваме како капитал. Македонското стопанство, и покрај специфичните три години, потврди дека е доволно стабилно и цврсто да се носи со сите предизвици“, посочи Јакимоска.
Според претседателката на Регионалната стопанска комора од Прилеп, Ирена Јакимоска, најголемите предизвици ќе бидат во првата половина од новата година година, а веќе во втората половина очекува закрепнување на економијата, па дури и можно зголемување на минималната плата поради енормните поскапувања.
„Ставот на стопанството е дека ние мора да најдеме начин за зголемување на животниот стандард на нашите вработени и на нашата популација се’ со цел за да можат останат да живеат тука“, кажа Јакимоска.
И покрај сите предизвици со кои се соочуваат и слабата поддршка од државата, прилепските компании успеваат да се изборат со кризата, па дури и да го зголемат бројот на вработени. „Ова можеби звучи парадоксално, но ние сме жилави и не се предаваме“ вели Јакимоска.
„Зголемувањето на вработувањата се должи заради тоа што македонските извозно-ориентирани компании во овој временски период се соочуваат со позитивен тренд на европските пазари и се едни од поклучните добавувачи во тој систем на добавувачи во Европа и сметам дека е сега баш сериозно, вистинско време каде што можеме да се сконцентрираме на техничко-технолошки раст се’ со цел за да можеме да ја задржиме нашата конкурентска вредност и за да ги задржиме пазарите во Европа“, објаснува Ирена Јакимоска, претседателка на РСК-Прилеп.
И покрај се прилепските бизнимени остануваат оптимисти, се надеваат дека новата 2023-та ќе биде подобра од 2022-та година.
Каролина Дурло
