Во Општина Делчево во моментот се реализираат 14 капитални проекти, најголемиот дел финансирани со средства обезбедени преку двата владини повици и унгарскиот кредит, при што вкупната вредност на инвестициите изнесува околу 150 милиони денари. Ова беше истакнато при денешната посета на претседателот на Владата Христијан Мицкоски, кој заедно со градоначалникот Иван Гоцевски изврши увид во реализацијата на повеќе инфраструктурни зафати во градот.
Градоначалникот Гоцевски информираше дека биле посетени реконструираната Индустриска улица, улицата „Видо Смилевски-Бато“, кејот на реката Брегалница, како и проектот што се реализира преку ИПА програмата за прекугранична соработка со Бугарија.
Тој нагласи дека Општината, покрај проектите што се реализираат со поддршка од Владата, работи и на нови локални инфраструктурни зафати, меѓу кои реконструкција на улици во повеќе населби и санација на оштетената патна инфраструктура.
Осврнувајќи се на финансиската состојба на Општината, Гоцевски рече дека долгот е значително намален.
– Долгот, кој изнесуваше над 180 милиони денари, денес е намален на околу 35 милиони денари. Очекуваме со поддршка од Владата конечно да се реши и прашањето со деблокирањето на сметката на Општина Делчево, изјави Гоцевски.
Премиерот Мицкоски оцени дека Делчево е пример за интензивна реализација на инфраструктурни проекти и најави дека Владата ќе продолжи со финансиската поддршка за општините.
– Во Делчево се реализираат десетици проекти. Очекувам во овој мандат сметката на општината да биде деблокирана за да може нормално да функционира. Владата останува посветена на поддршка на општините, бидејќи преку нив директно се подобрува квалитетот на живот на граѓаните, изјави Мицкоски.
Тој информираше и дека е распишан повик за изработка на физибилити студија и проектно решение за експресниот пат Кочани – Виница – Делчево, што претставува прв чекор кон реализацијата на една од најзначајните инфраструктурни врски за источниот регион.
Според најавите, најголемиот дел од тековните инфраструктурни проекти во Делчево треба да бидат завршени до крајот на август.
