Министерот за надворешни работи и надворешна трговија, Тимчо Муцунски денеска на средбата со вршителката на должноста амбасадор на САД во земјава, Никол Варнс упати честитки по повод 250-годишнината од независноста на САД, истакнувајќи дека овој значаен јубилеј претставува сведоштво за континуитетот, институционалната стабилност и трајната виталност на американската демократија и нејзините темелни вредности.
На средбата, како што соопшти МНРиНТ, соговорниците го потврдиле силното македонско-американско стратешко партнерство, изградено врз заемна доверба, споделени вредности и заеднички стратешки интереси.
Воедно биле разменети мислења за претстојниот Самит на НАТО во Анкара, при што била потврдена заедничката посветеност на имплементацијата на целите договорени на претходниот Самит во Хаг.
Посебно внимание било посветено и на следните чекори во спроведувањето на приоритетите утврдени на Втората сесија на Стратешкиот дијалог, одржана во април 2026 година, со акцент на конкретни иницијативи и засилена институционална соработка.
