– Градоначалникот на општина Чаир, Изет Меџити, одржа работна средба со делегација на Универзитетот „Мајка Тереза“, на која беа договорени следните чекори за соработка во рамки на платформата „Чаир во ритамот на здравјето“. Првиот резултат од оваа соработка е организирањето на Летната школа за пливање, наменета за деца на возраст од 5 до 10 години. Наставата ќе биде бесплатна и ќе се одржува на базенот во Чаир, под водство на професори и асистенти од Факултетот за физичка култура при Универзитетот „Мајка Тереза“, соопштија вечерва од Општина Чаир.
На средбата било разговарано и за проширување на соработката со нови проекти од областа на здравството, спортот и образованието, како и за текот на работите за изградба на новиот кампус на Универзитетот „Мајка Тереза“.
– Инвестирањето во здравјето на децата и партнерството со образовните институции остануваат меѓу нашите приоритети. Преку оваа соработка создаваме нови можности за младите и реализираме проекти што директно придонесуваат за нивната благосостојба и иднина – се истакнува во пишаната изјава на Меџити.
