Се потежок станува животот во државата. Ниту најавата за стабилизирање на цените, не влева оптимизам кај граѓаните. Инфлацискиот товар од поскапените храна и струја, е причина за речиси половина од населението живее во сиромаштија или е во ризик. Две и пол минимални плати, минатиот месец биле потребни за да се покријат минималните трошоци за едно четиричлено семејство. Револтирани се бидејќи јазот помеѓу минималната и функционерската плата е огромен.
“Они си ги качија платите, а другите не треба да живеат. Пензиите ни се многу мали, а и работниците земаат мали плати. Премногу е скапо“ коментираат граѓаните.
Речиси 50% од доходот граѓаните го трошат за храна и станарина, за разлика од потрошувачката кошничка на Европската Унија, каде што храната и енергијата учествуваат со околу 30%, покажуваат податоците во последната анализа во пукбликацијата „Квалитет на живот„ на „Фајненс тинк„. Граѓаните сметаат дека допрва ќе стануваме зависни од увоз на храна. Македонија се помалку произведува храна од она што и е потребно. Незадоволството на земјоделците ги бркаат младите од селата, објаснуваат производителите кои денеска продаваа на штипскиот пазар.
“Младите не сакаат да работат, нема пари во земјоделието. Како шо нема кој да работи и овие цени се добри. И ние повеќе нема да работиме, земјоделието ќе оди во колапс, така да си знае министерот“ велат земјоделците кои денес на пазарот во Штип ги продаваа своите производи.
Според истата публикација на „Фајненс тинк„ нашата држава во четвртиот квартал минатата година, по индекс на мизерија од 33,4 била трета во земјите од Европа. Пред нас се Босна и Херцеговина и Турција.
Александра Ристевска
