Во Скопје денеска ќе се одржи конференцијата „Зајакнување на деловниот интегритет преку јавно-приватна соработка“, посветена на прашања поврзани со транспарентноста, спречувањето на корупцијата и улогата на јавно-приватното партнерство во создавање предвидлива и одговорна деловна средина.
Настанот е организиран од М6 Едукативен центар во рамки на активностите на Француски фонд за борба против корупција (FLCC) – регионален проект финансиран од Агенција Франсез де Девелопман (AFD) и имплементиран од Expertise France, во партнерство со Амбасада на Франција во Република Северна Македонија.
На конференцијата поздравни обраќања ќе имаат министерот за правда Игор Филков, министерот за дигитална трансформација Стефан Андоновски, амбасадорот на Франција Кристоф Ле Риголер, заменик-директорката за добро управување во Expertise France, Полин Жирар, претседателот и сопственик на М6, Светозар Јаневски, како и извршната директорка на М6 Едукативен центар, Елена Младеновска Јеленковиќ.
