Шестотини млади спортисти од четири региони денеска во Скопје се дел од финалето на државното првенство во рамките на „Плазма – Спортските игри за млади“ во Скопје и ќе се натпреваруваат за пласман на меѓународното финале во Сплит (17 – 22 август). Натпреварите се одвиваат во десет дисциплини: Coca-Cola Cup 2011, мал фудбал (2015), баскет 3х3, ракомет, одбојка, одбојка на песок, народна топка, тенис, шах, пинг-понг и атлетика.
Министерот за спорт Борко Ристовски на отворањето на финалето во Општина Кисела Вода истакна дека реализацијата на настанот претставува исполнување на заложбите државата да стане дел од овој голем меѓународен проект. Тој нагласи дека поддршката за вакви настани ќе продолжи, бидејќи тие не се важни само поради резултатите, туку и поради вредностите што ги носат.
– Не е најважно кој ќе победи, туку децата да научат вистински вредности и да ги сфатат поразите како лекции што ќе ги направат подобри личности – рече Ристовски, додавајќи дека Владата и Министерството ќе продолжат да поддржуваат иницијативи кои го развиваат спортот и младите.
Градоначалничката на Општина Кисела Вода, Бети Стаменковска Трајковска, нагласи дека е чест што општината е домаќин на финалето. Таа посочи дека просторот каде се одржуваат натпреварите бил целосно обновен во изминатата година како резултат на заедничка соработка меѓу институциите.
– Заедно, со поддршка на Владата, Министерството за спорт, Општината и Град Скопје, направивме нов почеток и создадовме услови за одржување на вакви големи настани – истакна Стаменковска Трајковска, упатувајќи им порака на младите учесници да настапуваат тимски и да постигнат успеси и на меѓународната сцена.
Претставничката на организаторот, Елена Мицковска, порача дека ваквите настани имаат пошироко значење од самиот спортски натпревар.
– Спортот е движечка сила и најголем амбасадор на една држава, а токму младите спортисти го докажуваат тоа. Целта е да се поттикнат фер-плеј, толеранција и дружење, и да се изберат најдобрите кои ќе ја претставуваат Македонија на финалето во Сплит – рече Мицковска.
Плазма Спортските игри за млади годинава по првпат се одржуваат во Македонија. Станува збор за манифестација што одбележува 30 години постоење и важи за едно од најголемите аматерски спортски натпреварувања во Европа, со главна мисија да обезбеди бесплатен спорт за секое дете. Освен Македонија, во игрите учествуваат и Хрватска, Босна и Херцеговина, Словенија и Србија.
