Собраниската седница, денеска, по подолга процедурална распарава, беше прекината и треба да продолжи попладнево во 15 часот. Речиси два часа пратениците расправаа по процедурални забелешки поврзани со гласањето за предлог-законот за соодветна и правична застапеност, во второ читање.
Потпретседателката на Собранието, Весна Бендевска, на почетокот од седницата информира дека за предлог-законот за соодветна и правична застапеност ќе се гласа дополнително, а пратениците ќе бидат навремено известени за денот и часот на одлучувањето.
Потоа повеќе пратеници од опозицијата побараа за законското решение да се гласа уште денеска посочувајќи дека има обезбеден кворум и дека не постојат пречки точката да биде ставена на гласање. Некои од нив побараа и денеска да се утврдат ден и час за одлучување по оваа точка.
Пратеникот Халил Снопче истакна дека точката не може да биде надмината, без да се определи термин за гласање.
Бендевска, која ја водеше седницата, не се согласи со ваквите толкувања нагласувајќи дека не постои рок во кој претседателот на Собранието треба да одлучи кога ќе се гласа по точката.
– Не е тргната од дневен ред точка 8 и не е точно дека постои рок кој имплицира дека веднаш треба да се изјасни датумот за гласање. Сите 120 пратеници дополнително ќе бидат известени кога ќе се вратиме на оваа точка – рече Бендевска.
Во текот на седницата беа изнесени и процедурални забелешки во врска со неприсуството на претседателот на Собранието, Африм Гаши.
По процедуралната расправа, Бендевска ја прекина седницата и најави дека таа ќе продолжи во 15 часот.
На дневен ред на продолжението на 11. седница, меѓу другото, се предлог-завршната сметка на буџетот за 2025 година, предлог-законите за високото образование, за обезбедување квалитет во високото образование и науката, како и Националната стратегија за спречување на корупцијата и судирот на интереси 2026 – 2030 година.
