Градоначалникот на Дебар, Фисник Меља беше на увид во работите за реконструкција на повеќенаменското спортското игралиште во село Могорче, при што изрази задоволство од текот на работите.
-Одблиску се запознав со динамиката на изведбата и можам да изразам задоволство од текот и квалитетот на до сега извршените работи. Како локална власт остануваме посветени на реализација на проекти кои ја унапредуваат спортската инфраструктура и создаваат современи услови за учениците, младите и жителите на секое населено место, објави Меља.
Додава дека овој проект се реализира со средства од Буџетот на Општина Дебар и претставува уште една значајна инвестиција во подобрување на условите за спорт, рекреација и училишни активности.
-Работите се одвиваат согласно предвидената динамика, а по нивното завршување жителите на Могорче ќе добијат современ и функционален простор за спортски, рекреативни и училишни активности. Вакви зафати ќе има и во другите рурални средини, посочува Меља.
Повеќенаменското спортско игралиште е во кругот на во подрачното училиште во село Могорче, кое функционира во склоп на деветолетката „Ристе Ристевски“ од село Долно Косоврасти.
Могорче е најголемо село во оваа општина, со околу две илјади жители, каде освен подрачното основно училиште, функционираат и истурени паралелки на дебарската гимназија.
