На редовната јулска крводарителска акција што денес се одржа во просториите на Општинската организација на Црвен крст – Делчево беа собрани вкупно 68 единици крв, со што уште еднаш беше потврдена хуманоста на крводарителите од регионот.
Од организацијата упатија благодарност до сите граѓани кои се вклучија во акцијата и со своето дарување придонесоа за обезбедување крв за пациентите на кои им е најпотребна.
– Благодарност до сите хумани граѓани кои денес беа дел од крводарителската акција и придонесоа за спасување на нечиј живот – порачаа од ОО Црвен крст Делчево.
Оттаму информираа дека активностите продолжуваат и утре, кога ќе биде реализирана крводарителска акција во Македонска Каменица, со цел да се обезбедат дополнителни резерви на крв.
Воедно, Општинската организација на Црвен крст – Делчево ги повика сите крводарители кои во текот на 2025 година стекнале јубилејно признание за 5, 10, 25, 50, 75 или 100 дарувања, како и оние кои сè уште не ги подигнале признанијата од претходните години, да се пријават во просториите на организацијата.
-Пријавувањето може да го остварат во нашата канцеларија на улица „Методи Митевски Брицо“ бр. 4 или на телефонскиот број 033/412-010. При пријавувањето потребно е да се приложи дарителската книшка, односно соодветен доказ за бројот на реализирани дарувања, додадоа од Црвен крст Делчево.
Рокот за пријавување е до 17 јули 2026 година.
