Поради инсталирање на СКАДА системот за мониторинг на дистрибуција на водата за пиење низ водоводната мрежа во Филтер станицата во текот на вечерните часови можни се прекини или намалувања во снабдувањето со вода пред се во високите зони на градот Штип. Градоначалникот на општина Штип, Иван Јорданов и директорот на ЈП „Исар“-Штип, Александар Арсовски на денешната прес-конференција истакнаа дека во тек е реализација на еден од најзначајните проекти за водоснабдувањето на Штип, кој чини 36 милиони денари, а средствата се обезбедени од вториот повик на Владата за реализација на проекти од суштинско значење за Општините.
Јорданов истакна дека СКАДА системот треба да реши долгогодишни проблеми со водоснабдувањето, а со него ќе се врши далечинско читање на податоците од водоводната мрежа.
-Ова е еден надзорна контрола на водоводната мрежа на повеќе точки, вклучувајќи ги сите главни линии, резервоарите за водоснабдување на територија на општина Штип, со што ќе се има контрола на издашноста-потрошувачката на вода на неколку реони и делови од градот – вели Јорданов.
Тој истакна дека анализите покажуваат освен кражбата на водата, огромни количини на преработена вода за пиење се губи и при дефектите на водоводната мрежа, а токму овој паметен систем ќе покажува и каде има дефекти на мрежата, со што екипите на ЈП „Исар“ и брзо ќе реагираат. Јорданов вели дека со оваа инвестиција ќе се намалат и загубите на водата за пиење, со што ЈП „Исар“ ќе има и помали финансиски загуби.
Директорот на ЈП „Исар“-Штип, Арсовски рече дека загубите на водата за пиење низ мрежата изнесуваат помеѓу 58 и 63 отсто, а со инсталацијата на СКАДА системот се очекува и значително да се намалат овие големи проценти на загуба на вода, која останува нефактурирана од нивна страна. Тој информираше дека досега е реализирано околу 50 отсто од проектот СКАДА систем на водоводната мрежа.
