Општина Кавадарци има отворени проекти во вредност од 19 милиони евра, рече денеска кавадаречкиот градоначалник Митко Јанчев, при презентирањето на нова веб-платформа со проектни активности од сите сфери.
Во присуство на раководители на повеќе сектори, тој претстави проекти во рурална и урбана средина и подвлече дека има експанзија во комуналната изградба.
– Сите овие проекти и многу други, ќе бидат ставени на новата апликација, на веб-страницата на интернет, секој ќе може да ги види со информации, слики и локации, појасни градоначалникот.
Старечки дом, обиколница, младински и пионерски дом, прва фаза од гасификација, реконструкција на градски отворен базен, доградба на спортски центар, изградба на картинг патека, доградба на покриен базен и изградба на спа центар, био пазар, дневен центар за лица со телесна и ментална попреченост, велосипедски патеки до Тиквешко Езеро, садење дрвја и цвеќиња, асфалтирање улици, се дел од проектите што се реализираат, во рамките на повеќе сектори.
