ЈУ Национален парк Пелистер во соработка со локалното население од селото Маловишта и со поддршка на други физички и правни лица, во текот на изминатиот викенд почна со подготвителни активности за изведба и поставување на нов објект веднаш до црквата Св.Спас (1886 мнв) која се наоѓа под Врв Вртушка (2010 мнв).
Врвот Вртушка заедно со цквата Св.Спас се со прекрасен видик и едни од најпосетуваните места во Националниот парк Пелистер и тоа во текот на целата година, информираа од таа јавна установа.
-Примарно објектот ќе биде во функција на сите посетители, а дополнително е планирано истиот да се користи и за поставување опрема од страна на ЈУ Национален парк Пелистер во функција на заштита на природата и мониторинг на видови. Во текот на изминатиот викенд се вршеше транспорт на потребна граѓа со помош на анимали до самата локација на 1886 метри надморска височина, информира Иванчо Тошевски, директор на ЈУ Национален парк „Пелистер“-Битола.
Работните активности ќе продолжат и во текот на претстојните викенди. Со цел побрза реализација на предвидените активности, од Установата упатија јавен повик до сите планинари, љубители на природата и до сите верници кои се во можност да земат активно учество во работните активности.
