Правдата мора да биде видлива, ефикасна и еднакво достапна за сите. Затоа, реформите во правосудството не се само европска обврска, туку наша одговорност кон граѓаните, рече министерот за правда, Јетон Шасивари на денешната средба со амбасадорката на Кралството Холандија, Узлем Џанел.
На средбата, како што информира Кабинетот на Шасивари, беше потврдена заедничката определба за интензивирање на соработката во спроведувањето на реформите во правосудството и зацврстувањето на владеењето на правото.
– Поддршката од Кралството Холандија е значаен поттик во овој процес, преку бројни проекти придонесува за јакнење на владеењето на правото, поголема отчетност и транспарентност на правосудните институции, поддршка на Академијата за судии и јавни обвинители, како и за реформите во пенитенцијарниот и пробацискиот систем, истакна министерот.
Според него, соработката меѓу двете држави во областа на меѓународната правна помош се одвива на високо професионално ниво.
-Министерството за правда останува цврсто определено за спроведување на суштински реформи, јакнење на независноста и интегритетот на правосудниот систем и продлабочување на партнерството со државите кои активно го поддржуваат европскиот реформски процес на земјата, наведуваат од Кабинетот на Шасивари.
