Општина Куманово доби ново противпожарно возило со капацитет од девет илјади (9.000) литри вода, донација од аеродромот во Инсбрук, Австрија, обезбедена преку долгогодишната соработка помеѓу Општина Куманово и покраината Тирол, соопшти денеска градоначалникот на општина Куманово, Максим Димитриевски.
Со донацијата, Територијалната противпожарна единица Куманово го доби седмото противпожарно возило, со што надлежните очекуваат да се зајакнат капацитетите на единицата.
-При примопредавањето, командирот на ТППЕ Куманово, Борис Станковски, се сретна со покраинската министерка за цивилна заштита и заштита при катастрофи, Астрид Маир, како и со раководството на аеродромот во Инсбрук и командирот на противпожарната бригада на аеродромот, соопшти Димитриевски.
Во објавата, тој наведува дека претставниците на ТППЕ Куманово во Австрија поминале петдневна обука за користење на возилото и се запознале со функционирањето на доброволните противпожарни друштва во Австрија и Хрватска.
-Искрена благодарност до сите партнери за поддршката и придонесот во унапредувањето на противпожарната заштита во Куманово-наведува Димитриевски.
Неодамна, од општината информираа дека е почната изградбата на гаражи за противпожарни возила во три села во Куманово. Општината преку потпишаниот Меморандум за соработка со противпожарната единица од Тирол, Австрија има обврска да изградба гаражи и да формира доброволни пожарникарски друштва во руралните средини. Куманово доби шест противпожарни возила и претставува значаен чекор во јакнењето на капацитетите на територијалната противпожарна единица Куманово.
