Не важно каде, важно да е титула претседател. Министерот Оливер Спасовски, со тоа што отворено не демантира, само ги подгреа шпекулациите дека можеби има амбиција да седне на местото на Ковачевски на тронот на Бихаќа, но и да биде кандидатот на СДСМ за шеф на државата. Во последното гостување на националната телевизија, и покрај упорното инсистирање на новинарот, Спасовски не стави крај на чаршиските муабети за неговите планови.
Најверојатно улогата на технички премиер за време на последните парламентарни избори и те како му ги поддигна амбициите на министерот за внатрешни работи, кој според гласините си има своја фракција во СДСМ и работи на случајот да добие некаква претседателска функција или кандидатура. Во времето кога на чело на Владата, а и во СДСМ беше Заев, Спасовски имаше јавни настапи, но претежно се држеше за работата на МВР, одржуваше пресови во врска со акции на министерството. Сега се појавува речиси секојдневно и тоа на спортски манифестации, саем за храна и слично, и за разлика од тогаш, сега Спасовски има став речиси за сите политички прашања во Македонија. Дали Спасовски работи на самопомоција, тој вели дека отсекогаш бил меѓу граѓаните.
Интересно е што токму на настаните на кои присустува Спасовски, кои се зачестени периодов, министерот промовира ставови кои се контра ставовите на неговата матична партија, дали тоа е заради собирање политички поени кај членството во обид да добие симатии за претседателска кандидатура или пак можеби во прашање е длабокиот раскол во партијата, засега е нејасно.
Но јасно е дека Спасовски за законот за амнестија кој е предмет на разгледување на меѓународната заедница, кој дополнително ги раскара власта и опозицијата е една од клучните точки за кои Спасовски оди контра одлуките на владата на Ковачевски. Како и едно од најкрупните прашања за заштита на животната средина и здравје на граѓаните односно работењето на рудникот Иловица.
А вчера во интервју за МТВ тој кажа и дека не се согласува што поранешните структури во СДСМ немаат раководни позиции, а тој тоа го кажал и на партиските состаноци.
Мери Симоновска
