Градоначалничката на Општина Кисела Вода, Бети Стаменковска Трајкоска, остварила онлајн работна средба со градоначалникот на полскиот град Сохачев, Даниел Јањак со кого отвориле прашања за идни заеднички иницијативи и културна размена меѓу двете општини.
Прес-службата на Кисела Вода денеска соопшти дека двајцата соговорници размениле мислења за можностите за продлабочување на соработката во сферата на локалната самоуправа, културата, младинските политики и спортската инфраструктура.
– Посебен акцент беше ставен на споделувањето искуства во модерното управување со општините, со оглед на тоа што градоначалникот Јањак зад себе има богата кариера во културата и администрацијата, а неговото раководство во Сохачев бележи високи оцени за развоен менаџмент – се наведува во соопштението.
Сохачев е град со длабоки историски корени и значајно културно наследство, познат во светот и како место со кое е тесно поврзан великанот на класичната музика, Фредерик Шопен. Оваа врска, посочуваат, претставува особено симболична поврзаност со Општина Кисела Вода, во чии рамки егзистира паркот „Шопен“.
– Оваа првична средба со градоначалникот на Сохачев, Даниел Јањак, е одлична основа за градење нови пријателства и долгорочно партнерство. Нашите општини споделуваат слични визии за развој и ставање на граѓаните во центарот на општинските политики. Преку паркот „Шопен“ во Кисела Вода и чествувањето на делото на овој музички великан, ние веќе имаме убава културна врска со ова подрачје во Полска, а верувам дека во иднина ова партнерство ќе прерасне во уште поблиски врски и конкретни проекти за доброто на жителите од двете општини – посочи во пишана изјава градоначалничката Бети Стаменковска Трајкоска.
