Американската војска во текот на ноќта извршила нов бран напади врз Иран. Според американските власти, меѓу целите биле ирански системи за противвоздушна одбрана и радарски станици. Централната команда на САД соопшти дека целта на операцијата била да се ограничи способноста на Иран да напаѓа трговски бродови во Ормускиот Теснец.
Техеран остро ги осуди нападите. Иранското Министерство за надворешни работи оцени дека американските дејствија ги уништиле сите дипломатски напори вложени во изминатите месеци. Во соопштението се наведува и дека САД предизвикале враќање на несигурноста во Ормускиот Теснец, како и нарушувања на меѓународниот трговски поморски сообраќај.
Како одговор на американските напади, Иран отвори оган врз американски бази во регионот. Исламската револуционерна гарда нападнала воени цели и воени бази во Јордан, Кувајт и Бахреин. Цената на нафтата денеска порасна за повеќе од 3 отсто, откако обновените воени напади меѓу САД и Иран повторно предизвикаа загриженост за испораките на гориво преку Ормускиот Теснец. Суровата нафта „Брент“ достигна цена од речиси 79 долари за барел.
