Во Музејот на Општина Радовиш денеска ќе се одржи Регионален форум на Југоисточниот плански регион посветен на одржливиот третман на биоотпадот, во рамки на проектот „Нула биоотпад: Системски промени во партнерство со граѓаните“, поддржан од Владата на Швајцарија преку Цивика мобилитас.
Проектот го спроведува Здружението за еколошко одржлив развој Зелен институт, во партнерство со Националното здружение на сопственици на приватни шуми, а неговата цел е да придонесе кон транзиција кон „нула отпад“ општини преку подобрување на управувањето со биоотпадот, намалување на загадувањето и ризиците од пожари, поефикасно искористување на ресурсите и поттикнување на циркуларната економија.
Поздравни обраќања ќе имаат градоначалникот на Радовиш, Љупче Почивалец, и претставник на Министерството за животна средина и просторно планирање. Форумот ќе го модерира Ана Петровска, а презентации ќе имаат Наталија Бургиева, техничка експертка и Аријан Тоска, финансиски/институционален експерт.
На форумот ќе бидат презентирани резултатите од базичното истражување за управување со биоотпадот, кое содржи анализи и предлог-модели за технолошки, финансиски и институционални решенија. Преку дискусија со претставници на општините, јавните комунални претпријатија, институциите, стопанството и други засегнати страни ќе бидат избрани најприменливите модели, кои ќе послужат како основа за изработка на предфизибилити студија за управување со биоотпадот во Југоисточниот плански регион.
