Намалувањето на затворските казни на криминалците од највисоките редови и натаму топ тема меѓу граѓаните, експертската јавност, но и политичките партии.
Дел од партиите кои се во владејачката коалција, но и дел од помалите партии во опозицискиот блок гласно говорат дека измените на кривичниот законик се своевидна амнестија на криминалците.
Од Декомратски сојуз, партијата со која раководи Павле Трајанов велат дека овие измени широко ги отвораат вратите за натамошна криминализација и го промовираат принципот на легализација на високата корупција од носители на власта.
Сосема е извесно дека ова е брутален напад врз владеењето на правото и правдата. Со овие змени се амнестираат од кривична одговорност актуелните функционери, но ќе ги користат и тие што веќе се осудени за ваков вид кривични дела.
Што се однесува на правдањата на власта дека со овој закон се овозможувала конфискација на имот, од партијата на Трајанов појаснуваат – Криминалците од власта најголем дел од украдените буџетски пари ги префрлаат на странски сметки во даночни рајеви, кои се недостижни за правдата, а сомнителниот имот во Македонија го регистрираат на туѓо име.
ЛДП пак се неми за измените на кривичниот законик, Алфа побара став од нив, но одговор не добивме.
Партијата на Морачанин пак е против овие измени, тие во Собранието гласале против, засега се дел од колацијата, но како што велат ќе следеле сериозни внатрепартиски разговори за што да прават понатаму.
И партиите од опозицискиот албански блок се против како што велат амнестриање на криминалците, БЕСА, Алтернатива и партијата на Меџити велат дека сомнително е тоа што предлог-измената на Кривичниот законик не е потпишана од министерот за правда, туку од неговиот заменик.
Имаме длабоки и основани сомнежи дека измените на Кривичниот законик се предлагаат и затоа што високи експоненти на ДУИ, но и на СДСМ, знаат дека по следните избори ќе бидат во опозиција и затоа сакаат да создадат рамка за да не се гонат кривично. Од што се плашат, тие најдобро знаат, а ние ќе дознаеме дури откако ќе бидеме на власт, кога ќе имаме пристап до сите валкани трикови на оваа антинародна власт, велат од Беса, Алтернатива, Демократско Движење.
Со измените кои експерсно поминаа во собранието, без политичка дебата и со налепено европско знаменце покрај другото, се намалуваат и затворските казни на лицата кои золупотребувале службена положба и овластување.
Мери Симоновска
