Едногласно со 88 гласа „за“, пратениците изглассаа продолжување на кризната состојба во снабдувањето со нафтени деривати за уште 90 дена. Одлуката падна по бројни одложувања и тензии во собранието. Пратениците од ДУИ не гледаа потреба предлогот се гласа по итна постапка, туку инсистираа на редовна. Гневни бидејќи минатиот петок материјали за други закони биле повлекувани, па повторно враќани на седница, обвинија за хаос во собранието. Пратениците од власта ја обвинија ДУИ дека намерно го блокира гласањето и дека ако кризната состојба која истекуваше денеска, не се продолжела до 20-ти октомври, ќе се создал јаз кој би можел да предизвика проблеми во снабдувањето со горива и скок на цените.
Сега се чека на новата одлука за цените на горивата од Регулаторната Комисија , а во меѓувреме владата интервенира со намалување на акцизите на бензините и дизелот, по што ќе следи и конечната пресметка на новите цени на дериватите. Во изминативе две недели, дизелот поскапе за 8, а бензините за 2 и пол денари по литар. За една седмица, пак, цената на светските берзи на нафтата од типот брент скокна за 15% на 88 долари за барел. Првпат кризна состојба поради конфликтот на Блискиот Исток беше прогласена на 23 март во времетрање од 30 дена. Потоа таа беше продолжена за уште 90 дена до денеска, а ќе трае најмалку до 20-ти октомври.
