Започна проектот за гасификација на спортската сала во Куманово. Екипите на Јавното претпријатие „Куманово-гас“ интензивно работат на прекоп и изградба на подземна инсталација за приклучување на спортската сала на природен гас.
-Паралелно се врши и изградба на системот за греење и вентилација во спортската сала. Продолжуваме да ја шириме гасоводната мрежа во Куманово – соопшти градоначалникот на Куманово, Максим Димитриевски.
Како што претходно информираше директорот на ЈП „Куманово-Гас“, Марко Митровски, ќе биде инсталирана мерно-регулациска станица и гасен котел со моќност од 900 kw кој ќе обезбеди затоплување на целиот објект.
Во тек се градежно-монтажни работи за реконструкција на системот за греење и вентилација во спортската сала во Куманово.
Со проектот финансиран преку владина поддршка за инфраструктурни проекти, треба да се подобрат условите за користење на објектот преку енергетски поефикасно затоплување и подобар квалитет на воздухот. Овој проект опфаќа поставување нова машинска котларница, современ систем за вентилација, вентилациски комори, каналска мрежа и друга машинска опрема.
Реконструкцијата на системот за греење и вентилација е дел од пошироката обнова на спортскиот објект што се реализираше во изминатиот период.
