Собранието денеска почна со работа по закажаните три пленарни седници, што беше проследено со процедурални обраќања на опозициските албански пратеници.
Претседателот на Собранието, Африм Гаши, ја прекина седницата и ги повика координаторите на пратеничките групи на вонредна координација.
Албанските опозициски пратеници реагираа дека претседателот на Собранието не го почитува Деловникот на Собранието со закажувањето на пленарните седници. Бараа од Гаши да ја образложи итноста за одржувањето на денешните седници.
Координаторката на „Европски фронт“, Рина Ајдари, цитираше член од Деловникот по кој треба да се свикува седница и оти сите материјали до пратениците треба да стигнат најмалку 10 работни дена пред одржување на седницата.
– Според член 74 став 1 од Деловникот, дневниот ред заедно со сите материјали треба да се достави кај пратениците најмалку 10 работни дена пред одржување на седницата. Исто така, по став 2 и 3 од истиот член, во случај кога има ургентна постапка ургентноста треба да се образложи писмено и ова ние го немаме. Каде е ургентноста тука во овој случај, праша Ајдари и го повика Гаши да почитува Деловникот на Собранието.
Гаши нагласи дека оваа седница е свикана врз основа на член 74 став 2. – Врз основа на овој член може да се закаже итна седница. Јас нема да дозволам да се злоупотреби Собранието – рече Гаши.
